മദ്യം വിഷമാണ് , അത് മനുഷ്യനെ നശിപ്പിക്കുന്നു

 മദ്യാസക്തി ഇല്ലാതാക്കാന്‍ ചികിത്സിക്കുന്ന ഒരു  ഡോക്ടര്‍   പുതിയതായി   വന്ന  ഒരു സംഘം രോഗികളെ  പരിചയപ്പെടുകയായിരുന്നു. അദ്ദേഹം  മദ്യത്തിന്‍റെ  ദൂഷ്യവശങ്ങള്‍   കാണിക്കാന്‍ രണ്ട്   ഗ്ലാസ്സ്  എടുത്തു.  ഒന്നില്‍  ശുദ്ധമായ  വെള്ളം   എടുത്തു.  മറ്റേ  ഗ്ലാസില്‍   മദ്യവും  എടുത്തു  മേശപ്പുറത്തു  വെച്ചു. രോഗികളെ  കാണിച്ചു.

തുടര്‍ന്ന്  അദ്ദേഹം  വെള്ളം നിറച്ച  ഗ്ലാസില്‍  ജീവനുള്ള ഒരു വിരയെ  എടുത്തിട്ടു. അതു   സുഖമായി അതിനകത്തു  കിടന്നു  കളിച്ചു.

അടുത്തതായി  ഡോക്ടര്‍ മറ്റൊരു   വിരയെ  എടുത്തു   മദ്യം  നിറച്ച  ഗ്ലാസ്സില്‍ ഇട്ടു. അത്  ഏതാനും  നിമിഷം  കൊണ്ട്      ചത്തു   ഏതാനും   മിനുട്ടുകള്‍  കൊണ്ട്  അതിന്‍റെ  ശരീരം  മുറിഞ്ഞു  മുറിഞ്ഞു  ആ മദ്യത്തില്‍  ലയിച്ചു.

തുടര്‍ന്ന്   ഡോക്ടര്‍ രോഗികളോട്  ചോദിച്ചു,                                                                     “ഈ പരീക്ഷണത്തില്‍  നിന്ന് നിങ്ങള്‍   എന്തു  മനസ്സിലാക്കി?’’

മിക്കവരും  ഒന്നും  പറഞ്ഞില്ല.  എന്നാല്‍   സാമാന്യം  നല്ലവണ്ണം  മദ്യപിച്ച ഒരാള്‍  വിഷമിച്ച്   എഴുനേറ്റ്  ഇളകുന്ന   കാലുകളോടെ  പറഞ്ഞു : “ഡോക്ടറേ, ഏതായാലും  ഞങ്ങള്‍ക്ക്  ഒരു കാര്യം   മനസ്സിലായി,   സ്ഥിരമായി   മദ്യപിക്കുന്ന  ഒരാളിന്‍റെ വയറ്റില്‍   ഒരൊറ്റ  വിര  പോലും   ഉണ്ടാവുകയില്ല , വിരയിളക്കാന്‍   മരുന്നൊന്നും  കഴിക്കാതെ  തന്നെ”